Nho Lobu Kantu Era Rapás

Si Nho Lobu, arguen grandi, ta kume dimas, nhos imajina kantu era rapaz nobu! Pois é! Nho Lobu, kel grandi kumelaun ki ka ta skodje mutu kuze ke-l ta kume, tinha kuatu fidju matxu el ku se mudjê, Nha Loba. Mudjê go na kel últimu partu ka rezisti pamo kabesa di kel Nholobin era mesmu grandon di forma ki kuzas roka dimas y mininu sai bibu ma el el morre na ora. Nton Nho Lobu fika el so ta kria kes minis, Ki es pari un di trás d’otu sima ki monti kazal gosta di pari na Fogu. Kês minis era sima skada, di taun pertu ki ses idadi era. Aliás, kel sigundu nese kantu Nha Loba inda staba ta da kel primeru máma y, komu fidju di kabra e rotxa kel ta bá, es fika tudu dós ta mama kel koitadu di ses má, te ki mudje fika seku raganhadu sima pó di lenha, ku máma ta pindra baxu sima kuza el teneba 200 anu.
Bem du volta a es mumentu di stôria y a sê grandi personajen, Nho Lobu Limária (na palavras di Arkulanu). Kel anu kume da mofinu na Fogu y minis di Nho Lobu staba tudu mangradu, ma sês pai ta kumeba tudu strumu y el teneba sê korpu brin-brin. Kel belu dia, Nho Lobu ferbê un pápa pa el kume el ku sê fidjus. Era un kaleron grandon di pápa ki ta daba pa mas di 20 arguén kumé. Nho Lobu panha kuatu pratu el furria dianti kês koitadu minis ki staba peli ku osu y el pôs kada ês un kudjerona di papa, ma ê ka intxis pratu ninhun, nen kês 2 más grandi. Baka sima Nho Lobu era el fika ta kume la me na kel kaleron, ma ta sorbe papa taun fasi y ku barunlhu ki kes minis, en vez di kume sês bokadin, ês fika tudu tarantadu ta spia-l. El brusga kel papa tudu na pokus sigundu y inda el bira el fra, ku minis ta djobe-l dentu kel sê odjon di baka foladu:
- Porra, es papa era poku, el ka fartan.
Kantu minis bem na ês, es ranka ta kume. Nho Lobu fika ta spiá-s el ta torna spiá-s. Nton el puxa kel pratu di ke-l mas miodin el fra-l:
- Kume ku bu ermun mas grandi. Komu nhos dós nhos e mas nobu nhos ka ta kume txeu.
Fika Nton kes dós mas miodin ta kume nun pratu. El, Nho Lobu el sorbe ke-l pápa na un bokada so. El bira, el torna spia pa kes dós mas grandi, el fra sin:
- É injustu kes dos mas miodu ta kume djuntadu pa nhos kume siparadu. El puxa pratu di kel mas grandi el fra-l:
- Kume ku bu ermon, nhos te mâma nhos mamaba djuntu y e ka gosin ki nhos sta bem mostra bakisa.
El bira el rapa kel pratu ku língua, xua , el po-l riba kelotu ki el tumaba primeru.
Mesmu asin el fra:
- Diabu di pápa ka tem sustentu, e ka sta fartan. Diberbunkadu!
Nton el puxa mas un pratu, el frá-s:
- Nhos e tudu ermun, nhos kume tudu djuntadu, na uniaun di família.
El da kel restin pan, el ka farta, komu óbviu. E la go ki, konsienti ma el staba ta peka gravimenti, el po mon p’artura el pidi Deus pa perdua-l y na baxa ki mon ta baxa, kelotu pratu bem pa sê boka. Kês minis fika ta spia-l tan. Nton el frá-s:
- Nhos e nobu inda, nhos tem txeu tenpu pa nhos kume, nhos pai sta ku vontadi kume y ku kabu pô-l, pur isu nhos ba ta guenta. Manhan Deus ta da más.
Prontu, si kalhar tudu arguén ta pensa ma asin Nho Lobu dja fika sasiadu di sê fomi tudu. Ma ki dia!!!!!!!!!!! Uns sinku minutu dipos barriga kumesa ta ronka-l. Kes minis, komu kuazi nada es ka kume, es fika la sintadu nkodjedu ku sês fomi, ku odju tudu trakoladu y duedju sima nó di korda. Nton Nho Lobu, ki fomi ka kababa inda, labanta el da dós volta y el pega na ke-l Nholobin mas nobu tudu el fika ta bota pa riba, ta finji ma el kre brinka ku-el y animá-s ês otu tudu. El bota-l pa riba uns kuatu bes y na bes di sinku el bota-l mesmu artu el raganha boka. Minin bem di tonbu la d’artura el kai dentu sê bokona y el e ka spera mas nada, el nguli-l. kel Nholobin ka morrê simé, pamo Deus ten. El fika na barriga-l Nho Lobu, sê pai, ta futu-futu. Kezotu Nholobins fika tudu ku medu ta koko pé, spantadu, odju ragilidu, koladu na kumpanher la nun kantu. Nho Lobu bira ta spiá-s ku gana kumê-s tudu, pamo el perde konpletamenti kontrolu di forsa di sê instintu di kumelaun, di gula. Minis kumesa ta txora, ta grita, ta mixa pé. Nho Lobu abri brasu sês dianti pa es ka ten kabu fuji y el bira el frá-s, ku un surrizinhu di fundu, ta tenta konvenses ma foi un asidenti:
- Nholobins, nhos tene medu papá?! Ka nhos fika ku medu nhos pai!
Ma tudu pa kumê-s!!! Na ke-l gritaria ki minis finka (era un akadirré ki obidu ba Brava unbés) guentis korre pa ba da difé, tudu ta pergunta kunpanheru kuze ki staba ta kontise na ká Nho Lobu ki minis staba ta pupa artu sin. Kantu monti guentis txiga es odja ma staba ta falta un di kes Nholobin, es bira ta pergunta undé ki kel mininu staba, tantu pa Nho Lobu komu pa Nholobins. Minis (Nholobins), ku medu, fra ma era sês pai ki bota-l pa artura el nguli-l. Guentis ruma na Nho Lobu ta ngoda-l:
- Ó Nho Lobu, fazê argun kuza, tenta vumita pa bu fidju sai, inda el sta bibu. Di zimola seja amor di Deus!
Nho Lobu, komu asin el staba ta sinti bem xeiu y se-l vumitaba fomi ta torna daba el, el pára el spiá-s tudu dentu rostu el frá-s:
- Nha guentis e ka mi, ami te djan kre vumita, ma N ka sabe kumodê! Ami N ka prendê vumita.
Guentis fik la na un esforsu, ta korre Nho Lobu mon na barriga, na kabesa, ta mete-l dedu na boka, ma simê ke-l omi ka tevi piedadi di vumita pa kel Nholobin sai dentu de linda ku bida. Y asin fika. Nho Lobu e taun “k’arguen”, taun limária ke-l kume sê propi kodê matxu, na kel Fogu di fartura, ma ki ora ki krizi panha y azágua ka da monti anu sigidu, kabu ta bira pretu sima brêu y un disnaturadu sima Nho Lobu ka ta skodje kuze ke-l ta kume y el ta faze tudu pa el stika se bandoba-l baka.