Era uma vez Nho Lobu ku Xibinhu

N stivi ta ler un post di nha broda Eliezer undi el ta konta monti stória nkadiadu di Nho Lobu ku Xibinhu. El kordan mimória pamo stórias di Nho Lobu ku Xibinhu e txeu, sin kumo kes di rei ki gerasaun kumo di nôs y mas pa trás ta konxe ben. Ben, keli sta ben ser un stória ki ta mistura rei xei di puder ku es dós kabesa kansadu li. Obrigadu nha bro pa es lenbra ki nho lenbra-m di skrebe es post li. Nho fra ma stória kaba y ma balá nborka, ma nho permitin dizinborka-l pan konta mas un.
Ben, stória di Nho Lobu ta kumesa ku kel diskrisaun tipiku: Nho Lobu e maior kumedor ki ten, golozu dimás y el ta faze tudu pa el kume u maximu ke-l podê y el ta kaba pa faze monti di asnera pa el konsigui intxi barriga ku karkel kuza. Ma Nho Lobu tanbé era burrin y sê stupidez senpri ta daba el pa tortu. Xibinhu, sê subrin, ê kel spertandjaun ki senpri ta sobresaíba ora ke-l tinha ki konfrontaba, na kualker situasaun, ku ke-l bestaun di Nho Lobu.
Nho Lobu da xpidienti pa el ba trabadja na ká rei, pamo trabadju ki staba dispunível era bera kuzinha na ratxa lenha y el podeba sinti txeru di tudu kes kumé sabi ki ta fazeda pa família real y, si guentis disfarsaba, el podê entraba ngatxadu y furta kumé sabi pa el tranka. El izibi ku Xibinhu ma se trabadju era sabi pa kaga, ma el ta sintiba txeru só sabi y ma el ta furtaba di vez en kuandu el ta daba na petu. Un simana dipós Xibinhu ba djobe trabadju na ká rei y es po-l komu xefi di kuzinha. Ben Xibinhu, spertu y abuzadu, perta kontrolu y po guentis ta bizia Nho Lobu pa el ka furtaba mas, ma el, komu el tinha direitus ki poku guentis ki ta trabadjaba la tinha, el ta saíba ku uns kume sabi, ki ta txeraba di lonji y el ta ba kumeba el na barba Nho Lobu, inda más ê ka ta daba el nun padás di nada. Nho Lobu fika go ta sinti so txeru y ta odja Xibinhu ta nhamé kuzas sê dianti, ku agu ta kortal na boka y senpri ke-l ba tenta da kel furtu, guentis ta staba la pertu ta kontrola. Opa, kabu fika-l mau! El kumesa ta ratxa lenha kun raiba disgrasadu ki kes padás fika ta bua ta kai la pra la. Kel matxadu ke-l staba ta uza era spesial pa rei pamo djel tinha txeu tenpu y djel tinha pasadu pa txeu gerasaun di família. Nho Lobu na sê fúria y ku fomi kumesa ta xa matxadu da na pedra, d'abuzu. Ke-l belu dia, el dal na pedra ku tantu forsa ki matxadu kebra. Suma djan fra antis rei gostaba txeu di kel matxadu y justu kela Nho Lobu ta ba kebra! Kabu bira-l pretu, pamo rei, furibundu, rezolvé na mata-l.
- "Porra, ês matxadu dja pasa pa txeu gerasaun, N ten un amor grandi pa el" - rei bira el fra Nho Lobu, kantu el staba ta faze-l justisa.
Rei pensa un bokadin ma el staba mesmu lixadu. El bira el fra guardas pa mata kel ratxador di lenha burru ki tê konsigui kebra-l midjó matxadu kel tinha la. Nho Lobu grita, ku medu ta kokó pé:
- "ka nho matan, N ten un solusaun pa es prublema. Nha subrin ki ta trabadja li ta kozê matxadu."
Rei spial di baxu pa riba el fra-l ma niguén ka ta kozê matxadu, ma el staba ta tenta ganha tenpu pe-l fuji ku kel konbersu sen kabimentu. Ma mesmu asin rei manda txuma Xibinhu y el pergunta-l si el ta kozeba kel matxadu mé. Xibinhu, klaru, à primera, fra ma naun, ma kela era disparati.
Nho Lobu, na sê dizisperu, ka xa-l nen kaba papia y torna ripiti ma era propi sin, ma Xininhu tinha ki konpó kel matxadu, pamo el Nho Lobu dje-l odjaba Xibinhu ta kozê matxadu txeu bés.
Rei nton bira el fra ma ok, ma nton el ta matás tudu dós, dja ki ês staba na trosa ku-el. Xibinhu, spertu sima el era, bira el fra:
- "Ok, N ta kozê matxadu sin, ma keli só si for ku freu di txotxoti Nho Lobu, ten ki ser mesmu dise-l."
Nton rei rezolve go na faze tudu pur tudu pa el odja kel matxadu konpodu. El manda mosus pa pega Nho Lobu pa kortal freu pa da Xibinhu pa kozê kel matxadu. Nho Lobu dja ganhaba algun spasu na es diskusaun tudu y, kantu kel odja kaga na odju, el tranka karreda kabesa baxu. Ma el era gordu dimas y guardas da riba de-l sima tiru pa pega. El korre te ki txiga riba rotxa y la e ka tinha kabu ba mas. Kantu Xibinhu da konta ma guentis ta pegaba el mé y ma ses korta-l freu e ka ta podeba kozê kel matxadu el fadiga. Nton el pensa un bokadin el razolve na da Nho Lobu korda. El grita riju la di lonji:
- " Nhos kudadu ku nha tiu, el ê bon na bua rotxa y sê-l txiga mar nhos ka ta odja-l mas pamo el ta nada dimas."
Nho Lobu obi-l ta fra sin el pensa ku-el mé: -" kreki N ta nada mé!!" El sarta kel rotxa el da la baxu el kai na mar di Fonti Bila. Ma Nho Lobu ta nadaba mofinu y mar di Fonti Bila ê bradu sen manha. Kaseia panha-l, el rola-l na areia y el leba-l baxu. El foga te ke-l morré y sê bakisa da kabu de-l mas un bés. Xibinhu kontinua na ká rei, inda más artu, ku txeu postu, ta izibi pa mundu interu y ta kumé só kuza sabi. Inda Onti N pasa la N atxa-l ta brusga un pratu kabritu ku mandioka, ki staba ta rasendê mantega terra y tanbé ku un garrafon di vinhu manekon, sintadu na un sonbra ki rei manda fazê na kel praia undi Nho Lobu kai ke-l ba morré di bés.