Krensas di Djarfogo na Fatisaria

Stôria ki ta kontadu di fatisera na Fogo e otus ilhas más superstisiozu di Kabu Verdi ta da livru – y ka só un! – sima padja.

Fatisera buâ di um kutelu pa kelotu el farfadja sê lumi di noti y dipôs el ba Noguera. Sê diskrisao na ês mumentu ê di kes más izuberanti y sê aspetu, di kes más horrível posível. Na Noguera, el ku kesotus tudu, ês ta fazê sês festa bedju, ês ta brinka avontadi ku sês bruxaria y dipos ês ta ba otu bês kasa undi ês ê un pessoa normal sima nôs tudu (Kê ka fiticeru(a), ê klaru!). Sin sinhor, fatisera(u) ó bruxa(u) ê un arguén ki ta sta sima tudu mundu na normalidadi, ki tem un vida kotidianu trankuilu na sosiedadi, ku direitus y deveris, ku maridu ó mudjer, ku trabadju ó não, ku fidjus, amigus… ma ki tem un briu na korpu di fazê maldadi, pamó el tem un spritu runhu ki ta krê fazê arguén normal kuza di prejudisial. Normalmenti ta fradu ma korpu ta fika na kasa detadu y ma arma ki ta tuma inisiativa di sai di korpu pa ês fastentura tudu. Nhôs fran gó na kabesa di kenha ki ta kebê tamanhu xuxadera?! Ma du ka sta fika prali ku kombersu di fatisera. Na Fogo stôrias ki ta kontadu ê txeu dimas y otu atê ê tema pa un bon anidota, ó parti di paródia. Ta fradu ma fatisera ka garda ramu tambarina, pamo duranti sês vôo ês ta kustuma tranka nael, u ki ta pôs ta fika xeiu di pankada ó até podê adia sês ida pa sês parki di festa: kel famosu Noguera, um lugar ki ka sabedu na undi, ma ki txeu krêdulu na assuntos di superstisao ta jura ma ezisti algures la na fin di mundu. Ora xan abri un parentisis ‘n stipula li també: sendu ês Noguera un pontu kumun undi tudu fatisera ta bai di tudu parti di mundu, debê tem la un língua universal disês ês só, pa ês podê ntendê kumpanheru; ó então ês ê tudu poliglota na kel lugar ki só ês podê bai, dividu a sê transendênsia. Dipós tem kestao di spasu (pensandu na el komu un spasu fíziku): Noguera debê ser tamanhu y artu pa kebê faticerus tudu y permitis buâ y, inda, el debê tem un txada pista di aterragen pa fasilita simultaneidadi di xegada di kel kambada di alma runhu. Ês li ê nh'akrescentu pa ês kontus ki, di tantu pontu, ta trapadja arguén kabesa. kakakakakakakaka!

Txeu arguén ta fra, na Fogo y otu ladu, ma izisti sin ês kuza tudu y ma malfetu dja da kabu di monti arguén, ma dja pô um monti fika dodu, nésiu ó duenti inkurável pa restu di bida. També ta fradu ma tem arguén ki tem odju runhu y ki sô el spia k’arkel kusa , el ta da kabu del dibês. Otus ta fra ma ten arguén ki tem boka fedi ki basta el abri boka y pronunsia sobri algu ó arguén, êl ta mofinal ó até matal. Ten stória di un homi ki falili pegal pinton y labanta kuel n’artura, ma kantu el odjal ta ba la na Séu, êl pidil praga y falili bira kabesa baxu el prêga na txon da morrê. Tên otu ki só el gaba arguén ki sta ku korpu sabi e bunitu, ês arguen, sêl ka kredal na ora, podê panha doensa mau ki ta lebal a morti. També ta fradu ma fatisera ta kume mininu nobu. Daí ta fazedu Seti ó guarda di kabesa di mininu y tudu arguén tem ki sta atentu pa fatisera ka entra y lebal kuel, sei lá pa undi. Ta kontadu txeu kuza y na kada kontu tem kel pontu akresentadu, sima ta fradu pa tudu kabu.

Agó du tenta ntendê razao dês mistériu tudu. Mi pesualmenti nta ka ta odja razao di ser dissu y nka ta kardita nen un bokadin ki fatisera ta buâ. É fizikamenti impusivel arguén labanta di txon sen nada pa supendel y guental y ainda proporsional movimentu. Y sendê? Opa, axo ki sendê gó ê trósa dimas! Ês kontan un stória otu dia ma tinha uns rapazis ki ta fazeba un grupu y ês ta sakeba na monti kutelu, kada ês kun pó ku lumi. Anton ês ta sakudiba kel lumi na un kutelu, dipós ês ta paga’l e na kelotu kutelu, otu rapaz ta farola disel. Kenha ki sta ta odja ês kuza di longi y ki ê krenti ma fatisera izisti, ta fraba logo ma fatisera stá ta buâ y ês ta karraga rozadi kelora y ês ta santá reza kê pa retraí spritu mau.

Malfêtu di un bon fatisera ka ta kura fási y só kes grandi djabakosu ê ki podê disvenda sê kura y tra kel spritu mau dentu di kel koitadu d’arguén ki ta sta posuídu, ta dadji na tudu arguén e na un guerra ki ka ta kaba. Arguén ki tenê kusa tem forsa sima kabalu y el ta da mundu interu nakú. Nada ka podê kuel a nao ser un otu arguén ki ta ntendê bem di spritu mau e mafêtu. Kuraderus na Fogo ê tudu xeio di dinheru, pamó ku sês “arti” ês ta kura kuza ki nen dotor kursadu ka ta konsigui ntendê ki fari kura. Ta fradu ma ten la uns ki ten dinheru na bidon y ki nunka trabadja duru na vida. Aliás ta fradu ma trabadju di kontatu ku otu mundu ê un kuza duru ki sô arguén kun dón spesial podê fazê. Di undi ês don ta ben, ninguen sabi, ma ta karditadu ma el ta sta na posi di sertus aventuradus ki ta reprezenta puder di Ben sobri Mal.
Ten pessoas ki dja pega fatisera ta txora na Kruz, ta fazê malfêtu. Orâ kel pegadu, fradu el ta da ó fazê tudu (literalmenti) pa ka kontadu nada pa mundu fika ta sabê kenha el ê. Ta fradu ma ora ki pegadu gó, ma kuzas ta korta y si ês bruxa krê realmenti fazê ês feitisu, el tem ki rekumesa tudu prosesu novamenti. Purtantu el tem ki tem kuidadu redobradu pa kuzas ka bai tudu “água-baixu”.Tantu ês podê ba Kruz ba txorâ arguén kês kre mata ó então uza otu prosesu di da kabu di kenha ki ka sta dás ku stangu. Ta fradu ma k’un obijetu ó kuzas intimu di um pessoa també ta fazedu malfêtu: sima meia, trus, karsinha, enfin. Ku meia, djan obi stôria ki ta fra ma ês ta spetal gudja duranti kes ses reza di trobesadu y dipôs ês ta nterral. Kela dja ta ba mata dibés, si ka djobedu djabakosu di kês bon pa kura ês pessoa em kauza.

‘N ka kre pasa noti ta lembra di tudu k’n kontadu, até purki nen na ês formatu digital ka tinha spasu pa poba ês kuza tudu, di tantu txeu y kontroversu ki tud’ês stôria ê. Ami ‘n nesê ‘n atxa ta kontadu, ‘n konta també, ma nka ta kardita na un só palavra du ki ta fradu sobri fatisera y ses bruxaria. Ma ki ês stória ta puxa bem pa imaginasao, lá isu el ta. Agó kenha ki pergunta, nhos fral ma’n fradu y ma kenha ki fram’el també fradu el; ma ka balê pena djobê fonti original pamó sê izisténcia ê tao remota kuantu ezistensia di grandis y eternus mitu di tudu civilizasao.