Stôria di Djarfogu

Era um bez.... Na kel tempu... ê manera di kumesa konta stôria na Djarfogo. Stôria pode ser meramenti um kusa verdaderu k passa ku guentis más bedju ou mesmu kes de tipo Nhô Lobu ku Xibinhu, Nha Bedja, ô di faticera, lobizómen, enfin... mâ tudês ê sim k ta kumesadu.

Kes guentis grandi gosta di fra arguên ma na sês tempu kusas era diferenti y ma gossin du tenê txeu liberdadi e du sta vivê sabi dimás; na sês tempu mininu ta ruspetaba arguen grandi dimás e ai di kenha ki só pensaba na manda un bokinha ô na raspondê de mâs modi. Era logo naku bedju y inda pá ku má ta mandaba ês pagamentu pamó ês staba ta djudâs iduka fidju. Mi ê un fan nûmur'un di kes stôria di guentis grandi di Fogo y sempre 'n ta fikaba na sês pé pan obiba ku atensan. Ês ta kontal k'un piada ki ka ta da pa kopia, ês ta pol sal y ês ta metê dentu stôria pa ês fazebu entendê bem y pel pode kumpri mesmu sê missan: fazê arguen ki ka konxe kuse kês passaba, interioriza ma bida ka foi fâsil pa ês y ma opurtunidadi di oji em dia ê pa du sigura ku unha e ku denti. Stôrias ta retrata tudu kês passaba na kel tempo ki mundu era otu, kês tinha só un ropa d'anda e kelotu di kasa; na kel tempo ki ês ka ta baba xkola, pamó ka tinha num tiston pa pagaba y tudu fidju di pastor da pastor, di piscador da piscador e di agrikultor da agrikultor; kel tempu ki mininus ta pastoraba ku sês pá, ki mudjês ta baba panha panasku pa intxi koltxôn, ki ta bada péna ku fundon pa ba trada agu; kel tempu ki ta karragada agu na barkin e ki s'êl mborkaba era um cansera pa torna ba panhal la kel fundu di rotxa.

Guentis grandi ta krê passanu mensagi ma dja teve un tempu ki ta tumada bênson e ki ka ta stada na mei di arguén grandi, tempu ki mâs nobu ka ta misturaba ku mâs bedju nem pa brinka; dja teve tempu en ki opiniao di arguén grandi ta kontaba mas ki di kenha kê más nobu pamo sê idadi e xperiênsia di bida e kel ruspetu ki tenda pa el.

Un tipu partikular di stória ki ta txumaba mi txeu atensan ê kês di tempu fomi korenta. Êl ta komoveba mi au mesmu tempu kel ta poba mi arri avontadi, dadu a kel manera kês ta kontaba el. Nêne di Beta kontaba mi um kel andaba di Tadju pa Sartu pa un litru di mindju y, inda kantu kel bá muil, midôr rombal ribal gran. Nha pai ta kontaba un em ki ês bába Bila el ku Baí di Txia di parmanhan sedu e só ês volta di noti, kuasi madrugada, má karragadu di mindju. Era mindju txeu y di kelora, na palavras di nha pai "tudu arguén labanta: uns ta ila, otus ta mui, otus ta pila y otus ta mâma". Modéstia à parti má stôrias di nha pai tinha un piada di faze arguén arri te ki agu rabenta na odju, êl ta meteba êl un dinâmika tal ki ta poba arguén kun interessi grandi na obil e sô êl ta parab'el ora ki tudo arguén tinha mesmu ki bá argun kabu. Kês stôria di Nhô Lobu ku Xibinhu era pa minis e ta trada kabel d'odju antis di kumesa, ma nhôs podê ten certeza ma ten arguén na Fogo ki ta kontal pa arguén grandi, adaptadu e klaru, y ês pa morrê di grasa. Nha má ta kontaba mi uns stôrias di Nha Bedja ku sês artimanhas di kazamentera. Stôria di fatisera y lobisómen go ta da arguén medu ki ka ta xa ninguén sai nem pa ba mixa na sukuru. 'N ta lembra di nha tia Noka ta kontanês di noti dipôs di djanta, sô pa medu danu di ba kasa e drumiba kuel, ma kasa ta fikaba frenti ku frenti. Kel k'era más korajozu ta trankaba un karreda y êl ta bába kasa, má kobardu ta drumiba lá mé té otu dia.