Azágua, un xperansa na Fogo

Azágua na Fogo ê un kusa ki tudo arguén ta sta ta spera ku boka raganhadu. Ten zonas ki sempri ta da algu tud'anu, ma ten zonas ki é txeu seku e ku bentu lesti, fôra pragas txeu ki ta torna difisil - sinao impusível - panha un xpiga mindju em kondisoes. Dja teve tempos ki tudu mundu tinha fé ma azágua staba ta ba ser bem susedidu y nu entantu kusas muda di rumo di dia pa noti. Kês kafanhotu ka mesê konvite y ês ta txiga la ta sarta di kontenti e ês ta nhamê tudu kusa, kesotus praga també ta fazê sês bon distragu ora kês imbisti na kes fijon ku bóbra. Ka ten mutu meios pa luta kontra ês. Agrikultura di sikeru ten ês grandi disvantagem e dipôs sê dimensao ka ta djuda mutu. Terrenus ê tudu grandi e distanti e kombati a pragas ta fika kada vêz maz difisil di ser levadu a kabu.

Ma povu ka ta perdê kel xperansa e fé na Nhordês. Ês ta ba tud'anu pa padjigal pa ês ba enterra kel mindju ku fijon y garda korbu. Assim ki kuzas necê y kumesa ta kersê ta botadu kel primer karsu (ki ta fradu monda la) y dipos dês sta maz grandin, ten rabida monda y até pode ten nesesidadi di ba rinka padja dipos dês dôs monda ben dadu ki ta pô arguén ku dôr pa tudu korpu sima kuza katrapila passa di riba dês. Ma tempu d'azágua ê un altura animadu ki tudu mundu ta labanta sedu, panha inxada y da riba ó da baxu pa ba karbata txon ó anton rapa padja. Ninguén ka ê supostu fika na kasa. Si ta fika e kenha ki ta prepara kumê pa leba pesual na padjigal. Arguén grandi ku nobu, pai ku fidju, mudjê ku maridu tudu ta sai ta ba mostra kel boa vontadi e kel fé inkondisional na Deus y na azágua. Ta kumedu dretu també pa podê ten forsa di rabida kel txon duru y kumida forti sima kamoka ó kuskus ku leti, djagasida, katxupa, karni, mandioka, batata e bon pexi. Ta gastadu txeu dinheru na paga omi pa ba monda e inda más dás kumê. Ultimamenti surgi un tátika di justa ki ê entrega arguén txon pa el koba ó fazê monda pa un presu fixu, sen responsabilidadi di dal max kuza. Ês fé ki arguén ten na azágua ê grandi y ê el ki ta leba tudu mundu a fazê kel trabadju duru mesmu ki tempu ka sta prometê grandi txuba, ê kel speransa ma kuzas podê muda di un ora pa otu ki ta pô tudu arguén ta fazê simentera. Mêsis di Julho pa Outubro ê di um xpetativa grandi.

Ma na tempu ki tem fartura, povu ta popa dinheru txeu. Ta tem bobra té pa da porku, fijon na txada e mindju pa fazê um monti garnel y inda txeu pastu pa limária kumé e da leti ku fartura. Guentis grandi ta konta ma na sês tempu leti ta karragada na barkin ki ta leba litru sima padja e ma keju ta fazeda txeu e ken ki sta fra txeu sta ta referi a dizenas dês.

Sô kenha ki ten kel kultura di campu ki ten kel konsiensia di kumo azágua ta djuda tudu mundu. Mesmu ki arguén ten trabadju fixu, kel ki azágua ta dal ta djudal popa dinheru e empregal na konstrusao di kasa, na kompra di otus artigus ki txon ka ta da y també na idukasao di fidjus.

'N ta lembra di nha mae ta insisti na azágua mesmu kuandu tempu ta staba kenti e txon seku raganhadu. Txeu bês du ta mondaba ku puera ta kubri kabesa e 'n ten un ermun ki ta kustuma fraba ma si mindju da, pa assabelel dentu ku. Nha mae ka ta suportaba fala mal di kuza sériu sima kela y el ta disatinaba kuel. Ma, du ba du ben, nha ermun tinha txeu razan di papia sin. Ê ka era kalor ku brinkadera, sol kenti di ratxa pedra y inda por sima txon seku sima lenha pô na lumi. Ma kês guentis grandi ninguén ka ta fikás di riba ora ki toka na assuntu di azágua y di trabadju abensuadu pa Deus. Sabendu kês ka ten ki gasta mutu dinheru kuel e ki si da el ta djuda txeu, fidjus ku familiaris tudu ten ki raganha kadera e trabadja sima burru. Um trabadju dignu d'omi, sima ês mesmu ês ta fra. 'N ka ta trás razao nissu pamó di fatu ês vivê na un tempu ki tudu arguén tinha kela inkutidu na kabesa, un tempu en ki azágua ta representaba mutu más y ki arguén ki era riku tinha ki ten txeu txon pa kultiva y també txeu limária. Embora tempu seja otu, du ten ki konkorda ma azágua ó ki da el ten só vantagen pa tudu mundu na kel ilha y na paíz tudu. Purissu ki na Fogo ês kultura ka morrê, embor'el debê dja esmoresê un poku na zonas menus abensuadu ku bons anus agríkula. Na Luzia Nunis, ben komu otu zonas di Piku azágua ka mutu famosu, mas sempri da un pokin pa purba: kês kuzinha berdi, kel mindju asadu ó ferbedu, kel balansia ó molon... enfin kel frutu di azágua ki terrenu sen grandi preparasao ta da tudu anu.