Djarfogo na korasan

Djarfogo, bem komo tudo ilhas di Kabu Verdi, sta na un xpetativa grandi, pamo daki a poku, na Maio, tem eleisões autarkikas. Ma na conselhu di San Filipe, kusas inda ten mas ki fra, pamo festa bedju di Nho San Filipe dja sta proximu: kel kurrida kabalu y argorinha, kel bada Bila pa tudu arguen di fora, kel ba fêra di noti na prisidiu, kel bôt'agu na txada y kel sabura tudo djuntu y konsentradinhu la na kel cidadi k so di fra nomi ta pertanu nos tudo, fidju di kel terra, korasão.

Dja ten un data d'anus k'n ka po pe na San Filipe pa es festa y nha sodadi ê txeu. Nha grandi vontadi ê passal es anu, pisa txon di Fogo y passa sabi dentu festa y kel kalor ki so na Fogo ten. Pa undi ki un kabuverdianu bai, el ta leba Kabu Verdi na sê korasão y Djarfogo nu ten'l presenti na nôs kombersu y na nôs atitudi, na nôs djagasida y na kuskus ku leti, na kafé ku kamoka, enfin... na tudo ki du ta fazê, pensa, sinti...

Un kusa importanti ki às vezis nen du ka ta liga ê alguns informasao sobre ilhas, ma nhos pode ten certeza ma, kandu menus du sta spera, alguém ta fazenu un pergunta di algibera sobre Kabu Verde ou sobre nôs ilha em particular. Ka du preguisa ku peskisa e ler um poku, até porki so el ta ponu mas a par du ki é di nôs interessi e el ta atualizanu sobre nôs paíz ki du ta ama di tudo korasão. Sobre Fogo, por exemplu, nada midjor ki bai na Wikipedia e karbata, pa du tapa kun txada di kusas e basofa, na bon sentidu de termu, ku resposta, kuandu du perguntadu, ê klaru: http://pt.wikipedia.org/wiki/Ilha_do_Fogo.